San Lawrenz huwa raħal li jinsab fil-Punent tal-gżira Għawdxija. Ir-raħal huwa mibni fuq art ċatta mdawra bi tliet għoljiet – Ta’ Għammar, Ta’ Gelmus u Ta’ Dbieġi. Dan tal-aħħar huwa 195 metru ‘l fuq mil-livell tal-baħar u huwa l-ogħla punt f’Għawdex. San Lawrenz għandu wkoll fi ħdan it-territorju tiegħu l-bajja sabiħa tad-Dwejra li hija rinomata għall-aspetti ekoloġiċi uniċi tagħha, mhux biss rikonoxxuti mill-Għawdxin u n-nies tal-lokal kollha iżda wkoll internazzjonalment. Iċ-ċensiment tal-1995 stabbilixxa l-popolazzjoni tar-raħal għal madwar 552 ruħ. Sat-Tieni Gwerra Dinjija, il-maġġoranza tan-nies tal-lokal kienu bdiewa. Illum ħafna nies tal-lokal huma jew impjegati tal-gvern jew jaħdmu għal rashom. L-arma ta’ San Lawrenz tikkonsisti f’tarka tad-deheb li fuqha hemm is-simbolu ta’ gradilja tal-ħadid b’żewġ weraq tal-palm fuq kull naħa. L-istoriku Bezzina ddeskriva l-weraq tal-palm bħala simbolu tal-martirju filwaqt li l-gradilja tal-ħadid kienet tirrappreżenta l-mod kif inqatel il-Qaddis Patrun tar-raħal. Il-motto tar-raħal huwa “Dominus protectio Mea” li jfisser “Il-Mulej huwa t-Tarka tiegħi”. Il-parroċċa ta’ San Lawrenz twaqqfet fil-15 ta’ Marzu 1893. Qabel din id-data r-raħal kien magħruf bħala Ta’ Ċiangura. Probabbilment l-isem kien jirrifletti dak ta’ familja jew laqam ta’ xi ħadd b’relazzjoni mill-qrib mal-lokalità. Mhux magħruf meta twaqqaf ir-raħal, iżda xi dokumenti jsemmu Ta’ Ċiangura qabel l-Assedju l-Kbir ta’ Għawdex li seħħ qabel Lulju tal-1551.